去年喺社交網爆seed鬧公關「機會論」嘅狄易達(新聞連結：http://bit.ly/1VTVMYM)，同年又跟台灣女星吳亞馨嘅姐弟戀玩完(新聞連結： ...
去年喺社交網爆seed鬧公關「機會論」嘅狄易達( 新聞連結：http://bit.ly/1VTVMYM )，同年又跟台灣女星吳亞馨嘅姐弟戀玩完( 新聞連結：http://bit.ly/29pNHJP )，好在達仔黑氣過後見彩虹，今年不但同友人投資搞室內設計配對平台，原來最近仲識咗新女友蜜運中，日前兩人到牛頭角嘆平民壽司，傾到興起時，新歡仲爆粗㖭，十分真性情，被讀者王小姐透過「爆相爆片」分享。王小姐接受電話訪問表示，日前喺牛頭角見到達仔帶新歡食平民壽司撐枱腳：「兩個人好明顯唔係朋友咁簡單，言談間都有身體接觸，一啲都唔見外，講到興起嘅時候，個女仔仲爆粗講『X樣』㖭，不過狄易達一啲都唔介意，兩個人仲傾得好開心，食得好甜蜜！間鋪頭喺淘大花園隔離嘅平民小店，狄易達都叫咗兩隻即開海膽，佢好親民有人想搭枱都唔介意。」從相片所見，新歡個樣有啲似「邦民女」陳嘉寶，着性感低胸衫嘅佢身材好好㖭，達仔嘅舊愛吳亞馨同劉沛蘅都係索女，認真好艷福！對於新歡「烈女陳嘉寶」被曝光，《蘋果》致電問達仔係咪識到新女友？佢猶豫咗一陣，終於坦白答：「哈哈哈，好難答呀，都係嘅，唔知點講，因為呢排忙緊8月個騷，變咗唔係太想公開講啫。」問到兩人拍拖幾耐？達仔話：「真係啱啱開始，一個月都未有。佢唔係做呢行，都算係朋友介紹。」咁點追佢㗎？達仔表示：「都係網絡囉，好正常囉，出嚟食飯。」記者讚女友身材好，達仔笑說：「咁都見到，哈哈！」對於讀者指女友傾到興起爆粗，達仔即護花：「吓，爆粗！佢有咩？應該唔係，我唔記得佢有。」記者指女友夠真性情，達仔十分認同：「真性情！其實我都唔介意，因為自己都唔係唔講粗口嘅人。」達仔話同女友相處好開心，只係最近自己比較忙，又要搞騷又要兼顧裝修配對平台，唔算好多時間陪女友。問到裝修平台生意好嗎？達仔話：「都好順利，本來預9個月收支平衡，家半年見到成績，好大挑戰，想做呢個行業嘅龍頭。」
