馮盈盈唔似一般港姐，講粗口之餘，又會公開講性話題，對男友仲咁主動，一時興起就當街啜。
探熱針
大台性女 馮盈盈當街吸啜男友面珠登
馮盈盈 16年參選港姐，以大熱姿態攞冠軍，參選時就已經高調講到明自己有個 10優醫生男友，不時係 Ig晒情侶相。呢排喺《後生仔傾吓偈》成日語出驚人，講埋啲性話題，作風大膽。而現實生活中都係咁開放，戀愛大過天，日日同男友 Martin糖黐豆，又成日係街頭公然調情，顛覆港姐高貴淑女形象。
獨自食雪糕
選完港姐後，馮盈盈做主持，又有得拍劇。呢日趁住唔使開工，佢最初一個人行 ifc，企喺間雪糕店前面不停踱步，又係咁望住隔籬小朋友杯雪糕，最後佢都係忍唔到口，上前買咗杯雪糕俾自己，仲食到一臉滿足咁款，睇嚟做港姐平時忍口都忍得好辛苦。
十指緊扣
食住雪糕一路行，過咗陣，男友 Martin就登場啦。兩個人企喺水牌前係咁撳，研究食乜嘢，揀好咗就出發。兩個人十指緊扣，拖到實一實，上扶手電梯時馮盈盈勁冧咁望住 Martin，愛意滿瀉。最後入咗間日式餐廳撐枱腳。
甜錫面珠登
熱戀期情侶日日見都唔會厭，過咗幾日佢哋去咗又一城拍拖，今次馮盈盈紮咗條孖辮仔，扮吓可愛。兩個人十指緊扣，毫無避忌咁大晒恩愛。行行吓撞到朋友，佢哋就企喺度吹咗陣水，傾完就繼續拍拖。《壹》仔發現佢哋每逢搭親扶手電梯都會有親熱動作，完全唔會浪費時間，而且放閃指數係幾級咁上升，最初佢哋兩個互望甜笑，跟住馮盈盈主動出擊攬住 Martin，用佢個墨魚嘴用力吸啜咗男友面珠登一啖，好 sweet。錫完面珠登 Martin仲攬住盈盈條腰擰頭撒嬌，馮盈盈即刻甜笑搓佢塊面，真係驚人唔知佢哋拍拖咁款。
撰文：鍾慧嘉
攝影、攝錄：陳亦龍、李溢敏、楊紫、李玄
來源 source: http://hk.next.nextmedia.com
|
鍾意就快D Share啦！
|
|
|
