掃呢頁CODE去手機

2017年11月22日 星期三

7年前捲志雲案無綫撤走寧進投地產發迹 進駐半山 __,志雲,無綫,陳志雲,

■寧進曾被列入「迷雲黨」而遭無綫棄用,轉行做地產經紀反而捱出頭。攝影:陳慧安【《蘋果》專訪】當年陳志雲的「迷雲黨」成員寧進,因廉署「威遠行動」被無綫棄 ...




【《蘋果》專訪】當年陳志雲的「迷雲黨」成員寧進,因廉署「威遠行動」被無綫棄如敝屣,在無綫十年期間都被投閒置散,結果寧進離開,此處不留人,自有留人處,寧進轉行做地產經紀,用七年時間大翻身,現年36歲的他於高峯期擁六、七層自置物業,今年初更擲1,100萬買入半山一個單位!

陳志雲於七年前在無綫擔任業務總經理時,捲入廉署「威遠行動」惹官非,案件糾纏多年,今年3月陳志雲和密友叢培崑上訴得直。當年同被拘捕的「迷雲黨」成員、在《志雲飯局》節目負責捧餐的寧進,雖然最後獲廉署撤銷擔保,但卻被無綫解除合約。當年30歲的寧進,毅然轉行做地產經紀,終於闖出一片天,由初入行做屋邨地產舖做到中環半山,由住屯門公屋做到高峯期有六、七層自置物業,今年初更擲1,100萬購入堅道一個700呎實用單位,正式由屋邨仔升呢上半山。



■寧進對提拔自己的陳志雲(右)感激不盡,兩人至今仍有聯絡。資料圖片 ■寧進(左)於10年捲入廉署「威遠行動」。

企街搵客

現於地產公司擔任經理的寧進,有一間屬於自己的辦公室,在他帶領下的員工,每月都賺到6位數薪酬,回望過去的寧進說:「其實無綫嗰時唔要我,我好唔開心,不過諗深一層,自己嗰時都30歲,仲喺電視台行行企企都唔係辦法,啱啱有朋友喺紅磡做地產,細個阿媽教落做人一定要有瓦遮頭,朋友就話可以邊做邊考牌,跟住就開始做咗地產經紀。」



■在無綫十年被投閒置散的寧進,在劇集《蒲松齡》擔任閒角。劇照 ■寧進現職地產公司經理,有自己的辦公室。
■36歲的寧進已成家立室,囡囡於去年出世。資料圖片

由藝人轉到地產經紀,寧進初期未能適應,諗過劈炮唔撈:「以前都算係藝人,出入有人招呼服侍,初初做地產,要企喺條街搵客,新盤開,又要同其他agent搶客,雖然有底薪,但比起我之前開泳池公司、酒吧生意,始終爭一大截。」幸好寧進沒有放棄,在肯捱肯努力之下,最後由屋邨仔變住半山。四年前寧進成家立室,迎娶初戀情人,囡囡於去年出世,他說:「我成日同人講,碩士、博士都不及人事,我天生鍾意講嘢,鍾意識朋友,咁啲客買完樓,你問吓佢哋做唔做到按揭,多啲關心吓佢哋,只要同佢哋做咗朋友,佢嘅朋友就自然成為你嘅朋友,買樓又會搵番你。」



睇好樓市

經紀雖然底薪不高,但勝在佣金豐厚,多勞多得,其後寧進開始有本錢買樓:「只需用呢嚿錢去做首期,之後租畀人等人幫你供樓,供樓壓力就會減輕好多。如果係打工仔,想儲首期真係儲到天光都未必儲到。」入行七年的寧進,眼看樓市雖然經歷金融風暴、政府加推辣招,但樓價不跌之餘反而每每破頂。曾擁六、七層自置物業的他說:「啲人成日話個市就冧,呢句說話我都聽咗好多年,啲所謂專家,又話嚟緊會加息,又話政府有辣招,老實講,呢啲報道害咗好多人,因為以我經驗,就算跌市,都肯定追唔番升嗰一浪嘅升幅,嗰時唔上車,追唔番,中途落咗車,又係追唔番。我哋地產佬成日都講,唔怕入錯市,最怕你唔敢入。」

採訪:王梓嫚




鍾意就快D Share啦!